Бино ба иттилои сардухтури маркази саломатии шаҳри Левакант бо дастгирии Лоиҳаи беҳтаргардонии ҳифзи саломатии модарону кӯдакон дар вилояти Хатлон ба Муассисаҳои тандурустии шаҳр 15 адад дастгоҳи фишорсанҷӣ ва 21 адад тарозу кӯмак расонида шуд. Ин дастгоҳҳо ба 4 МС ва 7 БС тақсим карда шуданд.
Баъди аттестатсияи давлатии хатм, ки рӯзи 28 июни соли 2019 ба анҷом расид, дар тамоми муассисаҳои таҳсилоти умумии шаҳр таъмиру рангуборкунӣ оид ба омодагӣ ба соли нави таҳсил оғоз гардид.
Мусобиқаҳои варзиши баҳри дарёфти Ҷоми КИ ҲХДТ дар шаҳри Левакант идома доранд. Бо ташаббуси ТҶҶ «Созандагони Ватан»-и Кумитаи иҷроияи ҲХДТ дар шаҳри Левакант даври дуюми мусобиқаи Футбол миёни деҳаҳои Тоҷикобод ва Навободи ҷамоати деҳоти «Ваҳдат» баргузор гардид.
Биноба иттилои Котиби комиссия оид ба ҳуқуқи кӯдаки назди мақомоти иҷроияи ҳокимияти давлатии шаҳр 26 нафар ятимони кулл дар басти якуми истироҳати тобистона дар назди муассисаҳои таълимӣ ба истироҳат фаро гирифта шуданд.
Бояд қайд намуд, ки истироҳати тобистона дар ҳашт муассисаи таълимӣ ва се муассисаи томактабӣ ба роҳ монда шуда, зиёда аз 80 ҳазор сомонӣ маблағ ҷудо карда шуд. Басти якуми истироҳати мактаббачагон дар майдончаҳои солимгардонӣ ба анҷом расида, басти дуюми он аз 8-уми июл оғоз мегардад.
4 июли соли ҷорӣ дар муассисаи таҳсилоти миёнаи умумии №3-и деҳаи Вахши ҷамоати деҳоти «Ваҳдат» мутахассисони соҳаи тандурустӣ вобаста ба пешгирии бемориҳои ВНМО дар якҷоягӣ бо кормандони МТТҲС дар байни омӯзгорон ва аҳолии ин деҳа доир ба пешгирии вируси норасоии масунияти одам ва бемории пайдошудаи норасоии масуният (ВНМО/ БПНМ) вохӯрӣ доир намуданд.
